სანდრო სულაბერიძე ახალგაზრდა ფოტოგრაფია.

თავის შემოქმედებაში იგი ბევრ დროს უთმობს ექსპერიმენტაციას და განსაკუთრებით ხშირად იკვლევს ფოტოს გადაღების სხვადასხვა ფორმასა თუ ხერხს.

წარმოდგენილი ნამუშევრები მის სერიიდან "მგზავრობა კახეთში" არის.
ფოტოები სანდრომ მანქანიდან მოძრაობისას გადაიღო და შესაბამისად ყოველ ჯერზე სხვადასხვა ეფექტი მიიღო - ხან გამოსახულება ისეთი წაშლილია, რომ აბსტრაქტულ ნახატს ემსგავსება, ხან კი, იმდენად სტატიურია, ძნელად დასაჯერებელია რომ მოძრავი მანქანიდანაა გადაღებული.

‘დიდი სიჩქარით მიმავალი მანქანის ფანჯრიდან დანახული ხედები ხშირად ძალიან შთამბეჭდავი და ამავდროულად ხელმიუწვდომელია. სანახაობა ყოველ წამიერად იცვლება, რაც უფრო ახლოს ხარ სცენასთან მით უფრო ცოტა დრო გაქვს აღსაქმელად. სამაგიეროდ შორი ობიექტები დიდი ხნის განმავლობაში უცვლელია და თანამგზავრობას საკმარისი დროით გიწევს, რომ კარგად შეათვალიერო მათი მონუმენტურობა.

ფოტოები "მგზავრობა კახეთში" ტრანსპორტის ფანჯრებია და ცვალებადი გარემოს უცვლელი პრინციპის დაფიქსირების მცდელობაა. სივრცეში სწრაფად გადაადგილებისას ახლოს მდებარე საგნები, კამერის ფარდას კონკურენციას
უწევს. ფოტოს გადაღებისას ჩამკეტის მოძრაობა გამოსახულებას სათანადოდ სწრაფად ვერ აფიქსირებს და წამიერი პროცესი თითქოს უსასრულოდ იწელება- წერს სანდრო.


ნამუშევრების შესახებ დამატებითი ინფორმაციისთვის, დაგვიკავშირდით.