მარიამ აქუბარდია ახალგაზრდა ხელოვანია, ძალიან კარგად გააზრებული და გაწვრთნილი ხელწერით. მისი ნამუშევრები ყოველთვის ამოდის ხელოვანის პირადი გამოცდილებებიდან, რომელიც შემდეგ განზოგადოვდება და უნივერსალურ განზომილებაში გადადის. როგორც თვითონ ამბობს ყველა მისი ნამუშევარი აფხაზეთზეა. უმძიმესი და ურთულესი გრძნობები და გამოცდილებები სრულიად აუღელვებლად, ბურუსით გადაკრული მელანქოლიური სიმშვიდით  არის დახატული და სახლის, მისი დაკარგვის, იძულებით გადაადგილებისა და მიკუთვნადობის საკითხებზე მსჯელობს. ამ ნახატების წაკითხვა ბევრნაირად შეიძლება – როგორც ბუკვალურად პირადი გამოცდილებების და მოყოლილი ისტორიების ილუსტრაცია, ასევე ალეგორიები იმ სოციო-პოლიტიკურ ვითარებაზე, რომელიც კონფლიქტის ზონაშია.

 

მარიამ აქუბარდია (დ.1991, გალი) დაამთავრა თბილისის სახელმწიფო სამხატვრო აკადემიის ფერწერის ფაკულტეტი (2013 წ. ბაკალავრი, 2017 წ. მაგისტრატურა). მარიამის შემოქმედება საკმაოდ პირადია- ტრიალებს საკუთარი გამოცდილებების, მოგონებებისა და ტკივილების გარშემო, თუმცა შემდეგ უნივერსალურ ხარისხში გადადის, ისე რომ ყველა დამთვალიერებელს შეუძლია საკუთარი თავისთვის ძვირფასის აღმოჩენა.
მარიამის ნამუშევრები გამოფენილა საქართველოსა და მის ფარგლებს გარეთ, მათ შორის ფრიდრიხ ნაუმანის ფონდის მიერ მხარდაჭერილი გამოფენა, ‘ხელოვნება და თავისუფლება’, თბილისი, 2020, თბილისის ონლაინ ბიენალე, 2020, ‘პერსონალური სტრუქტურები’, ვენეციის 57-ე სახელოვნებო ბიენალეს პარალელური ღონისძიება, პალაცო მორა, ვენეცია, 2017, ფენიქს გალერეა, ნიუ იორკი, 2016. 2019 წელს მისმა პროექტმა ‘ყინვის საწინააღმდეგოდ შეფუთული ციტრუსის ხეები’ გაიმარჯვა ჰეინრიხ ბიოლის ფონდის კონკურსში ‘ბაუჰაუსი’ და განხორციელდა თბილისში, სადგურის მოედანზე.

ნამუშევრების შესახებ დამატებითი ინფორმაციისთვის, დაგვიკავშირდით.